SULOH NYANG AKHE

Bismillahirrahmanirrahim

Sulôh nyang akhé bèk ta-éh lé,

Bedoh boh hate duek melaga.

Ban tekejôt tema taduek lé.

Tema tapiké limong pekara.

Nyang awai phôn ingat, ke Tuhan,

Kedua tèelan ingat kedèesya.

Ingat ke dèesya tamoë bekajém,

Tema takhém-khém 'oh nebri bahla.

Tema nyang kelhèe ingat ke maté,

Getanyoë ,tacré tatinggai dônya.

Dônya taikôt tinggal disinoë,

Getanyoë tawoë u asai mula

Asai bak tanoh muwoë bak tanoh,

Tuhan petengoh u Padang Mahsya,

Tema nyang kepeet ingat ke kubu,

Taduek teku-ku tarô ie mata

Taduek sidroë ngonte pi tan,

Sidroë tèelan dalam kerenda.

Sepôt pi that arat pi sangat,

Lemah tempat dalam nuraka.

Teka 'adeeb mubagoë-bagoë,

Talakèe woë lom lam dônya.

'Oh talakèe teka gurantang,

Pakon that bôk-bang dilèe lam dônya.

Yôh lam dônya hau thèe kedroë,

Laju tapetoë ho nyang hawa.

Telah jinoë tan paidah,

Lom metamah 'adeeb séksa.

Telah jinoë apôh ulèe,

That paléh kèe sembahyang hana.

Adak kuthèe dum nyoë balah,

Han kuminah bak musalla.

Tema nyang limong ingat akhérat,

Hana tréb lambat taduek lam dônya.

Taduek lam dônya dum thô reôh,

Misé tapiyôh yub kayée raya.

Menanke misé taduek di sinoë,

Dang-dang tawoë u nanggroë baka.

Haba lôn nyoë kon pakri-pakri,

Hadih Nabi Panghulèe kita.

Meng han tapatéh wahé rakan,

Lam Qeruan tajak paréksa.

Menyo han j eet makna Qeruan,

Tamerakan ngon 'ulama.

Pat nyang han j eet betatém tanyong,

Pat han kenong betaparéksa.

Lebéh that pangkat Nabi getanyoë,

Tan meng sidroë nyang mèe tapesa.

Buleen di langet jitrôn u bumoë,

Nabi getanyoë jipumelia.

Lam sapai bajèe buleen jitamong,

Rakyat tecengong jikalon rupa.

Jitebiet sinan jilingka Kakbah,

Rakyat bahrullah jikalon rupa.

Tujôh sen tujôh jilingka sabé,

Hireen sikaphé jikalon rupa.

Jitebiet sinan ji-ék u langet,

Bintang mublèt-blèt pujoë Rabbana.

Sidum nan Mihreet Nabi Muhammad,

Sikaphé laknat han jipecaya.

Jipegah menoë jipegah medéh,

Sikaphé paléh asoë nuraka.

Mumada 'oh nyoë dilée silapéh,

Laén lön tuléh meng na kutika.